查看完整版本: 住在池底的少女

住在池底的少女

[size=4]時間：99年o既一個午夜‧地點：一個舊屋公園‧人物：Cat、四眼妹

呢日係校內大考結束o既大日子，我同好朋友四眼妹就o係呢晚去o左卡拉ＯＫ慶祝一番，玩到大約十一點幾才離開，落車時已是十二點左右。

我o地習慣由巴士站穿過公園到樓下大堂坐底，但奇怪係o係呢一刻，我o地不約而同咁感到呢個公園存著一股怪風，跟住仲聽一把唱緊歌o既女聲。

o係好奇心驅使下，本來唔係八卦o既我o地立即跟住呢把女聲走到水池邊來。見到有個著住睡衣o既少女獨自坐在水池邊，雙腳插入池裡，嘴邊仲哼緊歌。

行埋少女旁邊正想開口之際，佢突然抬頭望向我o地。佢面容好憔悴，好似滿有心事咁，仲流住眼淚問我o地有冇愛錫自己的男人。我o地對望o左一下，然後向佢點頭話「有」。佢好激動咁大叫一聲後就跳o左落池，我o地亦o係毫無防範下畀佢拖埋落去。

個少女將我o地又推又撞，發晒癲話：「世上絕對冇愛錫女人o既男人，你o地千祈唔好受騙。」之後我o地就被撞暈o左。

醒返刻發覺原來o左o係醫院，我o地梗係要同身邊o既家人解釋究竟發生乜事。我阿媽聽完後面都黑埋話我o地一定撞到「污糟o野」。

阿媽話幾年前當我o地仲細，曾經有一個女仔係畀佢男朋友搞大個肚後，迫佢墮胎，但個女仔唔肯。o係一次衝突下，個男仔錯手殺o左個女朋友，然後仲肢解埋佢，掉入呢個水池度。

阿媽仲話撈屍刻，男工人撈極到撈唔起個麻布袋。後來換o左兩個女工人先可將個袋撈起。睇落個女仔好抗拒男人。

四眼妹個阿媽仲話佢搞我o地可能係妒忌，佢吩咐我o地出院後立刻返到水池邊拜祭一下，仲要入廟轉運添。

李終貴按：究竟你兩個住o左呢條幾耐？定話你o地成日都唔返屋企呢？咁轟動o既新聞有乜理由咁遲先知？終貴雖然對呢件事抱有存疑，但亦悟出道理：「小心女人」。

位少女點可以用一枝竹打沉一船人呢。個個男人都唔一樣o既，我夠可以話十個女人，九個心胸狹窄。學四眼妹阿媽話齋，佢都係妒忌你o地o者，如果唔係點解佢唔搞男[/size]人呢